जैन इरिगेशनला नॅशनल ॲकॅडमी ऑफ ॲग्रिकल्चरल सायन्सेसचे कॉर्पोरेट सदस्यत्व
जळगाव: शाश्वत शेती आणि आधुनिक तंत्रज्ञानासाठी देशभरात नावारूपाला आलेली जैन इरिगेशन सिस्टिम्स लिमिटेड ही कंपनी आता नॅशनल ॲकॅडमी ऑफ ॲग्रिकल्चरल सायन्सेस (NAAS) ची कॉर्पोरेट सदस्य बनली आहे. कृषी संशोधन आणि विकासाच्या क्षेत्रात हे एक महत्त्वाचे पाऊल मानले जात आहे. विशेष म्हणजे, कॉर्पोरेट सदस्य म्हणून जैन इरिगेशन ही NAAS ची देशातील एकमेव कंपनी आहे.
काय आहे NAAS?
१९९० मध्ये स्थापन झालेली NAAS ही संस्था भारतातील कृषी संशोधन, शिक्षण आणि धोरणांसाठी एक अग्रगण्य थिंक-टँक म्हणून ओळखली जाते. सध्या या संस्थेमध्ये ८२१ सदस्य आहेत. जैन इरिगेशनला मिळालेले हे सदस्यत्व कंपनीसाठी तसेच भारतीय कृषी क्षेत्रासाठी महत्त्वपूर्ण आहे.
सहकार्याचा उद्देश
या भागीदारीबद्दल बोलताना जैन इरिगेशनचे उपाध्यक्ष अनिल जैन यांनी समाधान व्यक्त केले. ते म्हणाले की, “NAAS सोबतचे हे सहकार्य आमच्या शाश्वत शेतीसाठी नाविन्यपूर्ण उपाययोजनांना चालना देईल आणि भारतीय कृषी क्षेत्र अधिक सक्षम करण्यास मदत करेल. यामुळे शेतकऱ्यांचे उत्पन्न वाढेल, तसेच राष्ट्रीय अर्थव्यवस्थेलाही बळकटी मिळेल.”
गेल्या सहा दशकांपासून जैन इरिगेशन ठिबक सिंचन, सौर ऊर्जा आणि इतर शाश्वत कृषी तंत्रज्ञानामुळे शेतकऱ्यांना सक्षम बनवत आहे. आता NAAS च्या वैज्ञानिक नेटवर्कचा फायदा मिळाल्याने जलसंधारण, जलसुरक्षा आणि शेतीत उत्पादकता वाढवण्यास मोठी मदत होईल, असा विश्वास कृषी तज्ज्ञांनी व्यक्त केला आहे.
