जळगाव महापालिका निवडणूक : भाजप-शिवसेना (शिंदे) युतीची घोषणा
राष्ट्रवादीशी चर्चेनंतर जागावाटप निश्चित
जळगाव (प्रतिनिधी) जळगाव महानगरपालिका निवडणुकीच्या पार्श्वभूमीवर महायुतीतील अनिश्चितता दूर झाली असून, भाजप आणि शिवसेना (शिंदे गट) यांनी एकत्रितपणे निवडणूक लढवण्याची अधिकृत घोषणा केली आहे. राष्ट्रवादी काँग्रेस (अजित पवार गट) यांच्याशी स्वतंत्र चर्चा करून जागावाटपाचा अंतिम निर्णय घेतला जाईल, अशी माहिती पालकमंत्री गुलाबराव पाटील यांनी दिली.
बुधवारी एमआयडीसी परिसरातील एका खासगी हॉटेलमध्ये झालेल्या महत्त्वाच्या बैठकीत हा निर्णय घेण्यात आला. बैठकीला पालकमंत्री गुलाबराव पाटील, आमदार राजूमामा भोळे, आमदार मंगेश चव्हाण, खासदार स्मिता वाघ, माजी महापौर नितीन लढा, शिवसेना (शिंदे) जिल्हाध्यक्ष विष्णू भंगाळे, आमदार चंद्रकांत सोनवणे आणि आमदार अमोल पाटील यांच्यासह दोन्ही पक्षांचे वरिष्ठ नेते उपस्थित होते.
जळगाव शहराच्या सर्वांगीण विकासासाठी भाजप-शिवसेना (शिंदे) एकत्र लढणार असून, सत्तास्थापनेसह जागावाटपाचा प्राथमिक आराखडा निश्चित झाला आहे. मात्र, महायुतीतील तिसरा घटक राष्ट्रवादी (अजित पवार गट) बाबतचा निर्णय प्रलंबित असून, लवकरच स्वतंत्र बैठक घेऊन चर्चा केली जाईल.
भाजपाचे प्रभारी मंगेश चव्हाण, आमदार राजूमामा भोळे आणि शिवसेनेकडून दोन पदाधिकारी राष्ट्रवादीशी चर्चा करणार आहेत. या चर्चेनंतर जागावाटपाची अधिकृत घोषणा केली जाईल, असे पालकमंत्री पाटील यांनी सांगितले.या युतीच्या घोषणेमुळे महायुती कार्यकर्त्यांमध्ये संभ्रम दूर झाला असून, येत्या काही दिवसांत निवडणुकीचे चित्र पूर्णपणे स्पष्ट होईल.
