जळगावात ९१ वर्षांच्या आजोबांसह तिघे बंद विहिरीत कोसळले; मुख्य अग्निशमन अधिकारी स्वतः विहिरीत उतरले, तिघांचेही वाचवले प्राण!
गणेशवाडीत मोटार काढताना काँक्रीटचा स्लॅब तडकला; जळगाव मनपाच्या जवानांचे थरारक रेस्क्यू ऑपरेशन
जळगाव (विशेष प्रतिनिधी): शहरातील गणेशवाडी परिसरात बुधवारी दुपारी ४:४० वाजेच्या सुमारास काळीज हेलावून टाकणारी दुर्घटना घडली. घराच्या पाठीमागे असलेल्या एका बंद विहिरीवरील काँक्रीटचा स्लॅब अचानक खचल्याने ९१ वर्षांच्या वृद्ध आजोबांसह तिघेजण थेट विहिरीत कोसळले. या घटनेमुळे परिसरात एकच खळबळ उडाली आणि नागरिकांचे धाबे दणाणले. मात्र, जळगाव मनपाच्या अग्निशमन दलाने दाखवलेली देवदूतासारखी तत्परता आणि स्वतः मुख्य अग्निशमन अधिकाऱ्यांनी विहिरीत उतरून राबवलेल्या थरारक बचाव मोहिमेमुळे (रेस्क्यू ऑपरेशन) तिघांनाही विहिरीतून सुखरूप जिवंत बाहेर काढण्यात यश आले आहे.
मोटार काढताना अचानक कोसळला स्लॅब:
मिळालेल्या सविस्तर माहितीनुसार, गणेशवाडी येथील रामदेव बाबा मंदिर व राधाकृष्ण मंगल कार्यालयाच्या समोरील एका घराच्या मागील बाजूस एक बंद पडलेली विहीर आहे. या विहिरीवर सुरक्षेसाठी काँक्रीटचा स्लॅब टाकण्यात आला होता. बुधवारी दुपारी या विहिरीतून इलेक्ट्रिक मोटार बाहेर काढण्याचे काम सुरू होते. मोटार ओढत असताना अचानक विहिरीवर असलेला जुना काँक्रीटचा स्लॅब मध्यभागातून तडकला आणि मोठा आवाज होऊन पत्त्यांसारखा कोसळला. यामुळे स्लॅबवर उभे असलेले तिघेजण थेट विहिरीच्या खोल अंधारात कोसळले.
मुख्य अधिकाऱ्यांची विहिरीत उडी अन् जीवाची बाजी:
दुपारी ४:४१ वाजता एन. के. पिंजारी यांनी या घटनेची माहिती जळगाव महानगरपालिकेच्या अग्निशमन विभागाला दिली. परिस्थितीचे गांभीर्य ओळखून मुख्य अग्निशमन अधिकारी अश्वजीत घरडे यांच्या नेतृत्वाखाली जवानांचा ताफा बंबांसह घटनास्थळी दाखल झाला. विहिरीत ९१ वर्षांचे वृद्ध असल्याने वेळ दवडणे धोक्याचे होते. त्यामुळे मुख्य अधिकारी अश्वजीत घरडे यांनी स्वतः दोराच्या साहाय्याने विहिरीत उतरण्याचा धाडसी निर्णय घेतला. त्यांच्या पाठोपाठ जवानांनी विहिरीत उतरून अत्यंत शिताफीने व सुरक्षितपणे तिघांनाही सुखरूप बाहेर काढले.
९१ वर्षांच्या आजोबांसह हे तिघे सुखरूप:
या दुर्घटनेत विहिरीत पडलेल्यांमध्ये रामलाल हिरामण भावसार (वय ९१), सिद्धेश महेंद्र भावसार (वय २४) आणि दर्शन राजेंद्र खाचणे (वय २३, तिघे रा. प्लॉट क्रमांक ९, गणेशवाडी) यांचा समावेश आहे. तिघांचेही प्राण वाचल्याचे पाहून त्यांच्या कुटुंबीयांसह संपूर्ण गणेशवाडीकरांनी सुटकेचा श्वास सोडला.
या जवानांनी गाजवले शौर्य:
या अत्यंत धाडसी आणि यशस्वी मोहिमेत वाहन चालक भारत बारीसर, देविदास सुरवाडे, निवांत इंगळे यांच्यासह फायरमन रोहिदास चौधरी, तेजस जोशी, सुमित साळवे, यश मनोरे, चेतन सपकाळे, विठ्ठल पाटील आणि ऋषिकेश वाघ यांनी महत्त्वाची भूमिका बजावून आपल्या शौर्याची प्रचिती दिली.
“घटनेची माहिती मिळताच अग्निशमन दल तातडीने घटनास्थळी दाखल झाले. सर्व जवानांच्या समन्वयातून आणि धाडसी प्रयत्नांमुळे तिघांनाही जिवंत बाहेर काढण्यात यश आले. वेळेत बचावकार्य झाल्याने मोठी जीवितहानी टळली.”
— अश्वजीत घरडे, मुख्य अग्निशमन अधिकारी, जळगाव महानगरपालिका
