जळगाव मीडिया प्रतिनिधी: जर तुम्ही ट्रेनने प्रवास करत असाल आणि जनरल तिकीट वापरत असाल, तर भारतीय रेल्वेने केलेले नवीन नियम तुमच्यासाठी खूप महत्त्वाचे आहेत. हे नियम प्रवास अधिक सुरक्षित, सोयीस्कर आणि पारदर्शक करण्याच्या उद्देशाने लागू करण्यात आले आहेत. यानुसार काही जुने नियम बदलले आहेत आणि काही नवीन अटी लागू करण्यात आल्या आहेत.
आता जनरल तिकीटावर त्या विशिष्ट ट्रेनचेच नाव असणार आहे, ज्यात तुम्ही प्रवास करू शकता. याचा अर्थ असा की, तिकीट घेतल्यावर तुम्ही कोणतीही ट्रेन न निवडता प्रवास करू शकत नाही. केवळ तिकीटावर नमूद केलेल्या ट्रेनमध्येच प्रवास करता येणार आहे. याशिवाय या तिकीटाची वैधता फक्त तीन तासांपर्यंतच मर्यादित असणार आहे. जर तुम्ही तीन तासांत प्रवास सुरू केला नाही, तर तिकीट अमान्य ठरेल. प्रवाशांची सुविधा लक्षात घेऊन आता जनरल तिकीट UTS या मोबाईल अ‍ॅपद्वारेही बुक करता येणार आहे. त्यामुळे लांबच लांब रांगेत उभं राहण्याची गरज नाही. घरबसल्या किंवा कुठूनही तिकीट काढता येईल. या अ‍ॅपद्वारे तिकीट बुक करताना UPI, डेबिट कार्ड, क्रेडिट कार्ड किंवा नेट बँकिंगसारखे डिजिटल पेमेंटचे पर्यायही उपलब्ध आहेत. त्यामुळे बुकिंग प्रक्रिया अधिक जलद, सोपी आणि डिजिटल झाली आहे. रेल्वे प्रशासनाने हे सर्व बदल प्रवाशांची सुरक्षितता, गर्दी नियंत्रण, आणि तिकीट विक्रीत पारदर्शकता आणण्यासाठी केले आहेत. मागील काही स्टेशनांवरील अपघात किंवा गोंधळाच्या पार्श्वभूमीवर हे पावले उचलण्यात आली आहेत.
या नव्या नियमांमुळे प्रवास अधिक नियोजनबद्ध होईल. तिकीट वेळेत बुक करून योग्य ट्रेनची निवड करता येईल. डिजिटल पद्धतीमुळे काळाबाजारीवरही आळा बसू शकतो. मात्र, काही अडचणींना सामोरं जावं लागू शकतं – जसं की एका विशिष्ट ट्रेनसाठी तिकीट असल्यामुळे ट्रेन चुकल्यास पर्याय उपलब्ध नसेल, आणि फक्त तीन तासांची वैधता असल्यानं वेळेचं अधिक भान ठेवावं लागेल. UTS अ‍ॅपद्वारे तिकीट बुक करण्यासाठी तुम्हाला अ‍ॅप डाउनलोड करून रजिस्ट्रेशन करावं लागेल. त्यानंतर लॉगिन करून Book Ticket या पर्यायावर क्लिक करायचं, प्रवासाचा तपशील भरायचा आणि पेमेंट करून ई-तिकीट घ्यायचं. त्यानंतर तुम्ही प्रवास सुरू करू शकता.
याशिवाय काही अतिरिक्त गोष्टी लक्षात ठेवणं गरजेचं आहे. उदाहरणार्थ स्टेशनच्या प्लॅटफॉर्मवर प्रवेश करण्यासाठी प्लॅटफॉर्म तिकीट अनिवार्य असेल. जनरल तिकीटधारक केवळ अनारक्षित कोचमध्येच प्रवास करू शकतात. तसेच, जनरल तिकीटावर कोणताही रिफंड दिला जाणार नाही, म्हणून प्रवासाचे योग्य नियोजन करणे आवश्यक आहे. जनरल तिकीट हा आजही प्रवासासाठी सर्वात स्वस्त पर्याय आहे. अचानक किंवा तातडीच्या प्रवासासाठी ते अत्यंत उपयुक्त ठरते. आता डिजिटल माध्यमातून तिकीट बुक करता येत असल्याने वेळ आणि श्रम वाचतात.
या बदलांमुळे भारतीय रेल्वेने प्रवाशांसाठी अधिक सुरक्षित, सोयीस्कर आणि पारदर्शक प्रवासाची दिशा निश्चित केली आहे. त्यामुळे पुढच्या वेळेस ट्रेनने प्रवास करताना हे नियम लक्षात घ्या आणि आनंददायी अनुभव मिळवा.
