गावठी कट्टा आणि जिवंत काडतुससह तरुणाच्या मुसक्या आवळल्या
एमआयडीसी पोलिसांची कारवाई
जळगाव प्रतिनिधि
गावठी कट्टा आणि जिवंत काडतूस बाळगणाऱ्या एका संशयिताच्या कुसनबा परिसरातून एमआयडीसी पोलिसांनी मुसक्या आवळल्या असून त्याच्याकडून एकूण ७२ हजारांचा मुद्देमाल पोलिसांनी जप्त केला आहे.
एमआयडीसी पोलीस ठाण्याचे पोलीस निरीक्षक पोका. निलिन ठाकूर यांना दि. ८ मार्च रोजी गोपनीय माहिती मिळाली की, कुसुंबा परिसरात तुषार अशोक सोनवणे (रा. खेडी आव्हाणे) नावाचा तरुण गावठी कट्टा घेऊन फिरत आहे. त्यांनी ही माहिती वरिष्ठ पोलीस निरीक्षक संदीप पाटील यांना कळविली. त्यानंतर गुन्हे शोध पथकातील पोलीस उपनिरीक्षक चंद्रकांत धनके, पोलीस नाईक छगन तायडे, किरण पाटील आणि राहुल घेटे यांना घटनास्थळी पाठवण्यात आले.
पथक हॉटेल पुष्पा (नशिराबाद रोड) येथे गस्त घालत असताना, हळदी रंगाचा शर्ट घातलेला एक तरुण मोसावर बसलेला आढळला. पोलिस त्याच्या दिशेने जाताच तो पळून जाण्याचा प्रयत्न करू लागला. मात्र, पोलिसांनी तत्काळ पाठलाग करून त्याला ताब्यात घेतले.
अटक केल्यानंतर संशयिताची झडती घेतली असता, त्याच्या कमरेत २०,००० रुपये किमतीचा गावठी कट्टा आणि २,००० रुपये किमतीची दोन जिवंत काडतुसे आढळून आली. तसेच, ५०,००० रुपये किमतीची होंडा शाईन दुचाकीही जप्त करण्यात आली.
या प्रकरणी पोलीस निरीक्षक नितीन ठाकूर यांच्या फिर्यादीवरून एमआयडीसी पोलीस ठाण्यात गुन्हा क्रमांक १४७/२०२५ अन्वये भारतीय हत्यार कायदा कलम ३/२५ अंतर्गत गुन्हा दाखल करण्यात आला आहे. पुढील तपास पोलीस उपनिरीक्षक चंद्रकांत धनके आणि पोलीस नाईक योगेश बारी करत आहेत.
