नशिराबादजवळ कुंटणखान्यावर पोलिसांचा छापा ; पाच तरुणींची सुटका, दोन मुख्य आरोपी अटकेत
नशिराबाद प्रतिनिधी : जळगाव महामार्गालगत टीव्ही टॉवरसमोरील मन्यारखेडा शिवारात अवैध देहव्यापार सुरू असलेल्या एका पक्क्या सिमेंट काँक्रीटच्या घरावर नशिराबाद पोलिसांनी बुधवारी (दि. ५ नोव्हेंबर) रात्री साडेदहाच्या सुमारास धडक छापा टाकला. या कारवाईत पोलिसांनी पाच तरुणींची सुटका केली असून, अड्डा चालवणाऱ्या दोन संशयितांना अटक करण्यात आली आहे.
गुप्त माहितीच्या आधारे पोलिसांना कळले होते की या घरात काही महिलांना व तरुणींना डांबून ठेवून जबरदस्तीने देहव्यापार करवून घेतला जात आहे. माहितीच्या सत्यतेची खात्री झाल्यानंतर नशिराबाद पोलिसांनी मानवी तस्करी प्रतिबंधक पथकाच्या (AHTU) मदतीने संयुक्त छाप्याची योजना आखली. छापा टाकल्यानंतर घरातून पाच पीडित तरुणींची सुटका करण्यात आली, तर दोन चालक आणि दोन मुख्य संशयित घटनास्थळावरून ताब्यात घेण्यात आले.
या प्रकरणी राहुल पाटील (रा. जळगाव) आणि राम बोरसे (रा. जळगाव) या दोघांना पोलिसांनी अटक केली असून, चेतन माळी आणि श्याम बोरसे यांच्याविरुद्धही गुन्हा दाखल करण्यात आला आहे. छाप्यात पोलिसांनी एकूण ₹६३ हजार ८० रुपयांचा मुद्देमाल जप्त केला असून, सुटका करण्यात आलेल्या तरुणींना तातडीने सुरक्षितस्थळी हलवण्यात आले आहे.
ही कारवाई सहायक पोलिस निरीक्षक आसाराम मनोरे यांच्या मार्गदर्शनाखाली पोलीस उपनिरीक्षक रवींद्र तायडे यांच्या नेतृत्वाखाली करण्यात आली. या मोहिमेत सहायक फौजदार संजय महाजन, हवालदार शरद भालेराव, चंद्रकांत पाटील, गणेश गायकवाड, सागर भिडे, मोनाली दहीभाते, युगंधरा नारखेडे, भूषण पाटील, युनूस शेख आणि ज्ञानेश्वर पवार तसेच AHTU पथकाचे अधिकारी व कर्मचारी सहभागी झाले होते.
या कारवाईमुळे परिसरात खळबळ उडाली असून, पोलिसांच्या तत्परतेमुळे मानवी तस्करीच्या या गंभीर प्रकरणावर वेळीच लगाम बसला आहे. जिल्हा पोलिस प्रशासनाने अशा प्रकारच्या कारवाया पुढेही सुरू ठेवण्याचा इशारा दिला आहे.
