दोन घरफोड्यांची अवघ्या 24 तासात उकल , एमआयडीसी पोलिसांची दमदार कामगिरी
सराईत गुन्हेगारासह विधीसंघर्ष बालक ताब्यात
जळगाव प्रतिनिधी
एमआयडीसी पोलिसांनी दमदार कामगिरी केली असून अव्यय 24 तासांच्या आत दोन चोरट्यांना तांत्रिक विश्लेषण आधारावर सीसीटीव्ही फुटेज तपासून दोघांना गजाआड केले असून त्यांच्याकडून हजारोंचा मुद्देमाल हस्तगत करण्यात आला आहे.
सूत्रांनी दिलेली माहिती अशी कि, सुरेश हिराराम सोलंकी (रा. सावीत्रीनगर, जळगाव) हे कुटुंबासह राजस्थान येथे गेले असताना चोरट्यांनी त्यांच्या घराचे कुलूप तोडून 1.6 लाख रुपयांचे चांदीचे दागिने आणि 40 हजार रुपये रोख रक्कम लंपास केली. 25 फेब्रुवारी रोजी शेजाऱ्यांनी घर उघडे असल्याची माहिती दिल्यानंतर ही घटना उघडकीस आली.
एमआयडीसी पोलिसांनी तातडीने तपास सुरू करत 51 सीसीटीव्ही फुटेज तपासले. तपासात, सराईत गुन्हेगार विशाल मुरलीधर दाभाडे (रा. रामेश्वर कॉलनी, जळगाव) आणि त्याचा साथीदार दिपक राजू पाटील (रा. तांबापूर, जळगाव) यांचा सहभाग असल्याचे निष्पन्न झाले. विशाल दाभाडे मध्यप्रदेशातील ओंकारेश्वर येथे लपल्याची माहिती मिळाल्यानंतर एमआयडीसी पोलिसांचे पथक तातडीने रवाना झाले. सायबर सेलच्या मदतीने आरोपीचा शोध घेत त्याला एका लॉजमधून ताब्यात घेण्यात आले. चौकशीत त्याने गुन्ह्याची कबुली दिली आणि साथीदार दिपक पाटील मुक्ताईनगर येथे पळून गेल्याची माहिती दिली. पोलिसांनी त्यालाही अटक करून 1.15 लाख रुपयांचे चांदीचे दागिने, रोख रक्कम आणि गुन्ह्यात वापरलेली दुचाकी जप्त केली.
विशाल दाभाडे हा जळगाव शहरातील वेगवेगळ्या पोलीस ठाण्यांत 12 घरफोडीच्या गुन्ह्यांमध्ये आरोपी आहे.
अल्पवयीन मुलाने केली दुसरी घरफोडी
22 फेब्रुवारी रोजी गणेशपुरी, मेहरुण येथे मोहसीन खान अजमल खान यांच्या घरातून 23,300 रुपये चोरीला गेल्याची तक्रार दाखल झाली होती. एमआयडीसी पोलिसांनी गुप्त माहितीच्या आधारे मास्टर कॉलनी परिसरातील एका विधीसंघर्ष बालकाने ही चोरी केल्याचे उघड केले. त्याच्याकडून चोरीस गेलेली संपूर्ण रक्कम हस्तगत करण्यात आली आहे.
हि कारवाई पोलीस अधीक्षक महेश्वर रेड्डी, अपर पोलीस अधीक्षक अशोक नखाते आणि उपविभागीय पोलीस अधिकारी संदीप गावीत यांच्या मार्गदर्शनाखाली पोलिसांनी कारवाई केली. पोलीस निरीक्षक संदीप पाटील, पोलीस उपनिरीक्षक राहुल तायडे यांच्या पथकाने हि कारवाई केली.
