मजुरांना चिरडणाऱ्या मुरूमचा डंपर चालक जेरबंद !
पोलिस अधिक्षक डॉ. महेश्वर रेड्डी यांनी दिली माहिती
जळगाव प्रतिनिधी ;- नशिराबाद पासून एकही अंतरावर असणाऱ्या जळगाव खुर्द येथे रस्त्याचा कामावर असणाऱ्या तीन मजुरांना चिरडणाऱ्या डंपर चालकाला पोलिसांनी सीसीटीव्ही फुटेजच्या आधारावरून अटक केल्याची माहिती पोलीस अधीक्षकांनी पत्रकार परिषदेत दिली . त्याला न्यायालयात हजर केले असता १५ मार्चपर्यंत पोलीस कोठडी सुनावली आहे. संशयित चालक प्रकाशकुमार सुदामाप्रसाद पटेल (वय २४, रा. उफरवली, जि. सिंधी, मध्यप्रदेश) असे अटक केलेल्या आरोपीचे नाव आहे.
जळगाव खुर्दजवळील उड्डाणपुलाशेजारी सव्हींस रस्त्याचे काम सुरू आहे. येथे परप्रांतीय मजूर काम करत होते. सोमवारी रात्री उशिरा नाल्याच्या बांधकामानंतर काही मजूर तिथेच झोपले. पहाटेच्या सुमारास मुरुम वाहतूक करणाऱ्या एका डंपरने त्यांना चिरडले. अपघातानंतर वाहनचालक घटनास्थळावर न थांबता पसार झाला.
सीसीटीव्ही फुटेजच्या आधारे पोलिसांनी मुरुम वाहतूक करणाऱ्या तिघा डंपर चालकांना चौकशीसाठी ताब्यात घेतले. सुरुवातीला आरोपींनी काहीही माहिती नसल्याचा दावा केला. मात्र, कसून चौकशीत प्रकाशकुमार पटेल याने डंपर रिव्हर्स घेत असताना झोपलेल्या मजुरांना चिरडल्याची कबुली दिली. आरोपी चालकाला रात्री उशिरा अटक करण्यात आली. न्यायालयाने त्याला १५ मार्चपर्यंत पोलीस कोठडी सुनावली आहे.
