जिल्हा बँकेच्या निवडणुकीत महायुतीची सरशी !
पारोळा, एरंडोल अन् भुसावळच्या जागा बिनविरोध; तीन दिग्गज नेत्यांच्या पत्नींची संचालकपदी वर्णी
जळगाव (प्रतिनिधी): जळगाव जिल्हा मध्यवर्ती सहकारी बँकेच्या निवडणुकीच्या रणसंग्रामात महायुतीने सुरुवातीलाच दणदणीत आघाडी घेत विजयाची पक्की पायाभरणी केली आहे. उमेदवारी अर्ज मागे घेण्याच्या अंतिम टप्प्यात राजकीय घडामोडींना अचानक वेग आला आणि पारोळा, एरंडोल तसेच भुसावळ या तीन प्रमुख सोसायटी मतदारसंघांतील जागा बिनविरोध झाल्याचे स्पष्ट झाले. या निवडीचे सर्वात मोठे वैशिष्ट्य म्हणजे तिन्ही ठिकाणी राजकीय क्षेत्रातील वजनदार नेत्यांच्या पत्नींची बिनविरोध निवड झाली असून, यामुळे जिल्हा बँकेच्या सत्तेत महिला नेतृत्वाला मोठी संधी मिळाली आहे.
या बिनविरोध निवडींमध्ये शिवसेनेच्या दोन आणि भारतीय जनता पक्षाच्या एका जागेचा समावेश आहे. यामध्ये विशेषतः पाटील कुटुंबाचा मोठा दबदबा पाहायला मिळाला. पारोळा सोसायटी मतदारसंघातून माजी आमदार चिमणराव पाटील यांच्या पत्नी नलिनी चिमणराव पाटील यांची बिनविरोध निवड झाली, तर एरंडोल सोसायटी मतदारसंघातून आमदार अमोल पाटील यांच्या पत्नी मृणाल अमोल पाटील यांनी बिनविरोध विजय मिळवला. एकाच राजकीय घराण्यातील दोन महिलांना जिल्हा बँकेच्या संचालक मंडळात स्थान मिळाल्याने संपूर्ण जिल्ह्याच्या राजकीय वर्तुळात याचीच जोरदार चर्चा रंगली आहे.
दुसरीकडे, भुसावळ सोसायटी मतदारसंघातून राज्यमंत्री तथा भाजप नेते संजय सावकारे यांच्या पत्नी रजनीताई संजय सावकारे यांचीही बिनविरोध निवड झाली आहे. या विजयामुळे जिल्हा बँकेच्या संचालक मंडळातील सावकारे कुटुंबाचे वर्चस्व आणि प्रतिनिधित्व पुन्हा एकदा अबाधित राहिले आहे.
महायुतीने या तीन जागांवर मिळवलेल्या बिनविरोध यशामुळे कार्यकर्त्यांमध्ये आणि महायुतीच्या गोटात प्रचंड उत्साहाचे वातावरण निर्माण झाले आहे. प्रभावशाली राजकीय कुटुंबांतील महिलांना मिळालेल्या या संधीमुळे बँक प्रशासनात नवा अध्याय सुरू होणार असल्याचे मानले जात आहे. या यशस्वी सुरुवातीनंतर आता संपूर्ण जिल्ह्याचे लक्ष उर्वरित मतदारसंघांमधील घडामोडींकडे लागले असून, अंतिम रिंगणात कोणते उमेदवार राहतात आणि कुठे चुरशीच्या लढती रंगतात, यावरच जिल्हा बँकेतील सत्तेचे अंतिम चित्र स्पष्ट होणार आहे.
