उजाड कुसुंबा येथे वृद्धाची गळफास घेऊन आत्महत्या
जळगाव : तालुक्यातील उजाड कुसुंबा येथे एका वृद्धाने झाडाला गळफास घेत आत्महत्या केल्याची घटना बुधवारी दुपारच्या सुमारास उघडकीस आली. या घटनेमुळे परिसरात हळहळ व्यक्त होत आहे.
अत्तरसिंग चमारसिंग पावरा (वय ७०, रा. उजाड कुसुंबा, ता. जळगाव) हे कुटुंबियांसह वास्तव्यास होते. बुधवारी दुपारी गावातील मराठी शाळेच्या मागील बाजूस असलेल्या झाडाला त्यांनी गळफास घेतला. ही बाब लक्षात येताच त्यांना तत्काळ शासकीय वैद्यकीय महाविद्यालय व रुग्णालयात हलविण्यात आले. मात्र वैद्यकीय अधिकाऱ्यांनी तपासणीअंती त्यांना मृत घोषित केले.
कारण अस्पष्ट; पोलिसांत नोंद
आत्महत्येमागील कारण अद्याप समजू शकलेले नाही. याप्रकरणी एमआयडीसी पोलीस ठाण्यात अकस्मात मृत्यूची नोंद करण्यात आली असून पुढील तपास पोहेकॉ संजीव मोरे करीत आहेत.
