जळगावच्या वाहतूक कोंडीचा तिढा सुटणार! ;महापौरांच्या ‘ड्रीम प्रोजेक्ट’ १०० फुटी रस्त्याचा मार्ग मोकळा

जळगावच्या वाहतूक कोंडीचा तिढा सुटणार! ;महापौरांच्या ‘ड्रीम प्रोजेक्ट’ १०० फुटी रस्त्याचा मार्ग मोकळा

हायकोर्टाच्या आदेशानंतर शेतकऱ्यांचा मोठा निर्णय! ; शिरसोली रस्ता ते संभाजीनगर महामार्ग थेट जोडणार

जळगाव मीडिया न्यूज I वसीम खान

जळगाव शहराच्या अंतर्गत वाहतूक व्यवस्थेला एक नवी आणि गतिमान दिशा देणाऱ्या, तसेच भविष्यातील वाढत्या विस्ताराला मोठी चालना देणाऱ्या अत्यंत महत्त्वाच्या ‘शिरसोली रस्ता ते एमआयडीसी छत्रपती संभाजीनगर महामार्ग’ जोडणाऱ्या प्रस्तावित १०० फुटी रस्त्याच्या उभारणीसाठी जळगाव शहर महानगरपालिकेने आता कंबर कसली आहे. या महत्त्वाकांक्षी आणि बहुप्रतिक्षित प्रकल्पासंदर्भात महापौर दीपमाला काळे यांच्या प्रमुख उपस्थितीत मंगळवारी (दिनांक ९ जून २०२६) संबंधित शेतकरी आणि जमीन मालकांची एक अत्यंत महत्त्वपूर्ण बैठक पार पडली. या बैठकीत रस्त्याच्या कामातील जुने अडथळे दूर करून विकासकामाला वेगाने गती देण्यावर अतिशय सकारात्मक चर्चा झाली असून जमीन मालकांनी जमिनी देण्यास सहमती दर्शवल्याने जळगावकरांच्या जिव्हाळ्याच्या प्रकल्पाचा मार्ग आता पूर्णपणे मोकळा झाला आहे.

इच्छादेवी चौक अन् अजिंठा चौफुलीतील कोंडी फुटणार!

महानगरपालिकेत पार पडलेल्या या हायप्रोफाईल बैठकीला महापौर दीपमाला काळे यांच्यासह नगरसेवक श्री. अरविंद देशमुख, नगररचनाकार अमोल पाटील आणि शहर अभियंता आर. टी. पाटील प्रामुख्याने उपस्थित होते. बैठकीदरम्यान महापौर दीपमाला काळे यांनी उपस्थित जमीन मालकांना व शेतकऱ्यांना या संपूर्ण प्रकल्पाची सविस्तर संकल्पना आणि त्याचे शहराच्या विकासातील योगदान समजावून सांगितले. हा १०० फुटी रस्ता पूर्ण झाल्यानंतर औद्योगिक वसाहतीकडून (MIDC) या मार्गाचा मोठ्या प्रमाणावर वापर सुरू होईल, जो जळगाव शहरासाठी एक मोठे वरदान ठरणार आहे. विशेषतः जड वाहनांची वाहतूक या बाह्यवळण मार्गावर वळवता येणार असल्याने, शहरातील सर्वात मोठी डोकेदुखी ठरलेले इच्छादेवी चौक आणि अजिंठा चौफुली परिसरातील वाहतूक कोंडी कायमची कमी होण्यास मदत होणार आहे. परिणामी, शहरातील अंतर्गत रस्त्यांवरील ताण कमी होऊन जळगावकरांचा प्रवास अधिक सुलभ होईल.

महापौरांचा ‘ड्रीम प्रोजेक्ट’; आधुनिक सुविधांनी सज्ज होणार नवा मार्ग

प्रस्तावित १०० फुटी रस्ता केवळ वाहतुकीची कोंडी फोडणारा ठरणार नाही, तर तो आधुनिक नागरी सुविधांनी सज्ज असलेला एक आदर्श विकास प्रकल्प म्हणून उभारण्यात येणार आहे. हा रस्ता विशेष नियोजनांतर्गत विकसित केला जाणार असून, यामध्ये मुख्य वाहतूक रस्त्यासह नागरिकांसाठी स्वतंत्र सायकलिंग ट्रॅक, जॉगिंग ट्रॅक, रस्त्याच्या दुतर्फा सुंदर वृक्षारोपण आणि आकर्षक लँडस्केपिंगचा समावेश असेल. शहराच्या सौंदर्यात आणि दर्जोन्नतीत कमालीची भर घालणारा हा प्रकल्प महापौर दीपमाला काळे यांचा ‘ड्रीम प्रोजेक्ट’ म्हणून साकारला जात असल्याने प्रशासन यावर विशेष लक्ष ठेवून आहे.

विनामूल्य जमिनीच्या तरतुदीला हायकोर्टाचा चाप; आता मिळणार टीडीआर (TDR)!

या प्रकल्पातील सर्वात मोठा कायदेशीर आणि आर्थिक पेच जमीन संपादनाचा होता. जळगावच्या मूळ डी.पी. (विकास नियंत्रण) रिपोर्टमध्ये संबंधित रस्त्यासाठीची आवश्यक जमीन विनामूल्य हस्तांतरित करण्याची जुनी तरतूद करण्यात आली होती, ज्याला शेतकऱ्यांचा विरोध होता. मात्र, उच्च न्यायालयाच्या (High Court) आदेशानंतर आता या प्रक्रियेला नवे आणि न्याय्य वळण मिळाले आहे. कोर्टाच्या निर्णयानुसार आता सर्व संबंधित जमीन मालकांना त्यांच्या जमिनीच्या बदल्यात हस्तांतरणीय विकास हक्क म्हणजेच ‘टी.डी.आर.’ (TDR) देण्यात येणार आहे. न्यायालयाच्या या निर्णयानंतर बैठकीत उपस्थित सर्व जमीन मालकांनी या प्रस्तावाचे स्वागत करत, टीडीआर स्वीकारून जमिनीचा ताबा देण्यास स्वेच्छेने सहमती दर्शविली. शेतकऱ्यांच्या या सकारात्मक भूमिकेबद्दल महापौरांनी सर्वांचे विशेष आभार मानले.

प्रक्रिया अत्यंत सुलभ ठेवून तातडीने प्रमाणपत्र देण्याचे  आदेश

जमीन संपादन प्रक्रियेत शेतकरी आणि लाभार्थ्यांना कोणताही त्रास होणार नाही, यासाठी नियमानुसार जमीन मालकांना तात्काळ टी.डी.आर. देण्याबाबत प्रशासकीय पातळीवर मनपा आयुक्तांना आवश्यक ते आदेश देण्यात आले आहेत. जमीन मालकांना कोणतीही अडचण येऊ नये म्हणून अत्यंत सुलभ, सोप्या आणि पारदर्शक पद्धतीने ही प्रक्रिया राबवली जाईल. “ही टी.डी.आर.ची प्रक्रिया वेळेत पूर्ण करून सर्व पात्र लाभार्थ्यांना त्यांचे टी.डी.आर. प्रमाणपत्र तातडीने उपलब्ध करून दिले जाईल,” अशी ग्वाही महापौरांनी या वेळी दिली. शहराच्या भविष्यातील निवासी, व्यावसायिक आणि औद्योगिक विकासाला या मार्गामुळे मोठी चालना मिळणार असल्याने, संबंधित सर्व जमीन मालकांनी आवश्यक त्या कागदपत्रांवर स्वाक्षऱ्या करून प्रशासनाला अंतिम सहकार्य करावे, जेणेकरून हा रस्ता लवकर पूर्ण होऊन संपूर्ण परिसराचा विकास वेगाने होईल, अशी अपेक्षा शेवटी महापौर दीपमाला काळे यांनी व्यक्त केली.