नाशिकचे ‘कारभारी’ गिरीश महाजन! रायगडची सूत्रे भरत गोगावलेंच्या हाती
शासनाचा मोठा निर्णय; दोन्ही महत्त्वाच्या जिल्ह्यांतील रिक्त पालकमंत्रिपदाचा तिढा सुटला!
मुंबई/जळगाव: राज्याच्या राजकारणातील अत्यंत महत्त्वाचे मानले जाणारे नाशिक आणि रायगड जिल्ह्यांच्या पालकमंत्रिपदाचा अखेर तिढा सुटला आहे. महाराष्ट्र शासनाच्या सामान्य प्रशासन विभागाने सोमवारी (१७ ऑगस्ट २०२६) अधिकृत शासन निर्णय (GR) जारी करत नाशिकच्या पालकमंत्रिपदाची धुरा राज्याचे मंत्री गिरीश गितादत्तात्रय महाजन यांच्याकडे सोपवली आहे, तर रायगड जिल्ह्याच्या पालकमंत्रिपदी मंत्री भरत विठाबाई मारुती गोगावले यांची नियुक्ती केली आहे. शासनाच्या या निर्णयामुळे गिरीश महाजन यांच्या राजकीय वजनात व जबाबदारीत आणखी मोठी वाढ झाली आहे.
गेल्या काही दिवसांपासून नाशिक आणि रायगड या दोन्ही जिल्ह्यांचे पालकमंत्री पद रिक्त असल्याने प्रशासकीय कामकाजात अडचणी निर्माण होत होत्या. या पार्श्वभूमीवर विकासकामांना गती देण्यासाठी आणि प्रशासकीय समन्वय अधिक मजबूत करण्यासाठी राज्य शासनाने हा निर्णय घेतला आहे. जळगाव जिल्ह्याच्या राजकारणात आपले वर्चस्व सिद्ध करणारे संकटमोचक मंत्री गिरीश महाजन यांच्याकडे आता उत्तर महाराष्ट्राचे प्रमुख केंद्र असलेल्या नाशिक जिल्ह्याची धुरा आल्याने महायुतीच्या गोटात उत्साहाचे वातावरण आहे. हा शासन निर्णय महाराष्ट्र शासनाच्या अधिकृत संकेतस्थळावर प्रसिद्ध करण्यात आला आहे.
