यावल उपसा सिंचन योजनेला गती द्या; जलसंपदामंत्री गिरीश महाजन यांचे निर्देश
१९ गावांतील ९,१२८ हेक्टर शेतीला सिंचनाचा लाभ प्रस्तावित; सुधारित प्रशासकीय मान्यतेसाठी आमदार अमोल जावळे यांचा पाठपुरावा
जळगाव, प्रतिनिधी : यावल तालुक्यातील १९ गावांमधील ९ हजार १२८ हेक्टर शेतीला सिंचनाची सुविधा उपलब्ध करून देणाऱ्या यावल उपसा सिंचन योजनेच्या प्रस्तावावर तातडीने कार्यवाही करण्याचे निर्देश जलसंपदा मंत्री गिरीश महाजन यांनी दिले. शेळगाव मध्यम प्रकल्पाच्या पाहणीदरम्यान त्यांनी प्रकल्पातील पाणीसाठा, पाणीवापराचे नियोजन आणि प्रस्तावित सिंचन योजनांचा आढावा घेतला. यावेळी आमदार अमोल जावळे यांनी योजनेच्या सुधारित प्रशासकीय मान्यतेसाठी आग्रही मागणी केली.
शेळगाव मध्यम प्रकल्पाची एकूण पाणीसाठवण क्षमता ४.११ टीएमसी असून, प्रकल्पांतर्गत ४.५१ टीएमसी पाणीवापराचे नियोजन करण्यात आले आहे. याच प्रकल्पावर प्रस्तावित यावल उपसा सिंचन योजनेच्या सुधारित प्रशासकीय मान्यतेचा प्रस्ताव मंत्रालयात सादर करण्यात आला आहे. या योजनेला तातडीने मान्यता मिळावी, अशी मागणी आमदार अमोल जावळे यांनी मंत्री महाजन यांच्याकडे केली. त्याची दखल घेत मंत्री महाजन यांनी जलसंपदा विभागाचे अपर मुख्य सचिव एकनाथ डवले यांना प्रस्तावावर तातडीने आवश्यक कार्यवाही करण्याचे निर्देश दिले.
१९ गावांतील शेतीला सिंचनाचा लाभ
यावल उपसा सिंचन योजना कार्यान्वित झाल्यानंतर तालुक्यातील १९ गावांमधील ९ हजार १२८ हेक्टर, म्हणजेच सुमारे २२ हजार ५५५ एकर क्षेत्राला सिंचनाची सुविधा उपलब्ध होण्याचे प्रस्तावित आहे. त्यामुळे लाभक्षेत्रातील हजारो शेतकऱ्यांना दिलासा मिळण्याची अपेक्षा आहे. सिंचनाची सुविधा उपलब्ध झाल्यास शेतीसाठी विहिरी आणि कूपनलिकांवरील अवलंबित्व कमी होण्यास मदत होईल. पिकांना वेळेवर पाणी मिळाल्याने उत्पादनातील चढ-उतार कमी होऊन शेतकऱ्यांच्या उत्पन्नाला आधार मिळू शकतो.
जळगाव-यावल प्रवासाचे अंतर २० किलोमीटरने कमी होणार
शेळगाव गावाजवळ प्रकल्पाच्या खालील बाजूस सुरू असलेल्या पुलाच्या बांधकामाचीही मंत्री महाजन यांनी पाहणी केली. हा पूल वाहतुकीसाठी खुला झाल्यानंतर जळगाव ते यावल प्रवासाचे अंतर सुमारे २० किलोमीटरने कमी होणार आहे. त्यामुळे विद्यार्थी, नोकरदार, रुग्ण आणि दैनंदिन प्रवास करणाऱ्या नागरिकांचा वेळ वाचणार आहे.
शेतकऱ्यांना जळगावच्या बाजारपेठेत शेतमाल पोहोचविण्यासाठी जवळचा मार्ग उपलब्ध होईल. विशेषतः भाजीपाला आणि फळांसारखा नाशवंत शेतमाल कमी वेळेत बाजारात नेता येईल. पुलाचे काम गतीने पूर्ण करण्याचे निर्देश मंत्री महाजन यांनी संबंधित क्षेत्रीय पाटबंधारे अधिकाऱ्यांना दिले.
तीन उपसा सिंचन योजनांच्या पुनरुज्जीवनाचा आढावा
रावेर विधानसभा मतदारसंघातील हतनूर कालव्यावरील आमोदा, बामणोद आणि भालोद या तीन उपसा सिंचन योजनांच्या पुनरुज्जीवनाचाही यावेळी आढावा घेण्यात आला. या योजना पुन्हा कार्यान्वित झाल्यानंतर सुमारे ३ हजार २०० हेक्टर क्षेत्राला सिंचनाचा लाभ मिळणार आहे.
या कामांसाठी सुमारे २१० कोटी रुपयांचे अंदाजपत्रक तयार करण्यात आले असून, शासनाच्या मान्यतेसाठी प्रस्ताव सादर करण्यात आला आहे, अशी माहिती अधिकाऱ्यांनी दिली. या प्रस्तावाला तातडीने मान्यता मिळण्यासाठी आवश्यक कार्यवाही करण्याच्या सूचनाही मंत्री महाजन यांनी दिल्या.
नदीघाट आणि पायऱ्यांच्या कामासाठी निर्देश
शेळगाव प्रकल्पाच्या खालील बाजूस नदीपात्रालगत धार्मिक आणि सामाजिक कार्यक्रमांसाठी नदीघाट व पायऱ्या बांधण्याची मागणी स्थानिक ग्रामस्थ आणि आमदार अमोल जावळे यांनी केली. नदीकाठावर उतरण्यासाठी ग्रामस्थांना सोयीची जागा उपलब्ध व्हावी, हा या मागणीमागील उद्देश आहे. या कामासाठी आवश्यक कार्यवाही करून ते तातडीने हाती घेण्याचे निर्देश मंत्री महाजन यांनी क्षेत्रीय अधिकाऱ्यांना दिले.
या पाहणी दौऱ्यावेळी माजी माहिती आयुक्त तथा सेवानिवृत्त अधीक्षक अभियंता व्ही. डी. पाटील, जळगाव पाटबंधारे प्रकल्प मंडळाचे अधीक्षक अभियंता गोकुळ महाजन, लाभक्षेत्र विकास प्राधिकरणाचे अधीक्षक अभियंता संतोष भोसले, उपसा सिंचन विभागाचे कार्यकारी अभियंता पी. पी. वराडे, शेळगाव प्रकल्प उपविभागाचे उपविभागीय अधिकारी हेमंत सोनवणे, नशिराबाद येथील शेळगाव उपविभागाच्या उपविभागीय अभियंता मंगल रेघे आणि शेळगाव प्रकल्प उपविभागाचे सहाय्यक अभियंता कामेश पाटील उपस्थित होते. तसेच आमदार अमोल जावळे, सुरेश धनके आणि जळगाव महानगरपालिकेचे नगरसेवक अरविंद देशमुख यांची उपस्थिती होती.
