विमान प्रवाशांसाठी दिलासादायक निर्णय; ‘स्मार्टबॅग’ सेवा सुरू
कमी खर्चात ३० किलोपर्यंत अतिरिक्त सामान नेण्याची सुविधा; प्रादेशिक विमान वाहतुकीत प्रथमच उपक्रम
जळगाव | प्रतिनिधी
विमान प्रवासादरम्यान अतिरिक्त सामानासाठी मोजावे लागणारे भरमसाठ शुल्क आता प्रवाशांसाठी कमी होणार आहे. प्रादेशिक विमान सेवा क्षेत्रातील आघाडीची कंपनी फ्लाय ९१ने प्रवाशांच्या सोयीसाठी ‘स्मार्टबॅग’ ही नवी ग्राहक-केंद्रित सेवा सुरू केली असून, या सुविधेमुळे कमी खर्चात ३० किलोपर्यंत अतिरिक्त सामान घेऊन प्रवास करणे शक्य होणार आहे.
अतिरिक्त बॅगेज शुल्काचा आर्थिक भार कमी
सध्या बहुतांश विमान कंपन्यांकडून अतिरिक्त सामानासाठी प्रतिकिलो ३०० ते ७०० रुपयांपर्यंत शुल्क आकारले जाते. त्यामुळे अतिरिक्त वजनाच्या सामानासह प्रवास करणाऱ्या प्रवाशांवर मोठा आर्थिक भार पडतो. विशेषतः शिक्षण, नोकरी, व्यवसाय किंवा स्थलांतरासाठी प्रवास करणाऱ्यांना याचा मोठा फटका बसतो. ही बाब लक्षात घेऊन फ्लाय ९१ने ‘स्मार्टबॅग’ सेवा सुरू केली आहे.
१ ते ३० किलो अतिरिक्त सामानासाठी आगाऊ बुकिंग
या योजनेअंतर्गत प्रवाशांना १ किलोपासून ३० किलोपर्यंत अतिरिक्त सामानासाठी आगाऊ बुकिंग करता येणार आहे. त्यासाठी केवळ १ हजार ते ३ हजार रुपयांदरम्यान शुल्क आकारले जाणार असल्याने अतिरिक्त सामान घेऊन जाणाऱ्या प्रवाशांना मोठा आर्थिक दिलासा मिळणार आहे.
विद्यार्थी आणि कुटुंबीयांना मोठा फायदा
घरापासून दूर शिक्षणासाठी जाणारे विद्यार्थी, नोकरीनिमित्त स्थलांतर करणारे कर्मचारी, व्यावसायिक दौऱ्यावर जाणारे प्रवासी तसेच कुटुंबासह प्रवास करणाऱ्यांना या सुविधेचा विशेष लाभ होणार आहे. कमी खर्चात अधिक सामान घेऊन जाता येणार असल्याने प्रवास अधिक सोयीस्कर होणार आहे.
आधुनिक सुविधांचाही लाभ
फ्लाय ९१कडून प्रवाशांसाठी व्हॉट्सअॅपद्वारे ऑटो चेक-इन, यूपीआय आधारित क्यूआर-सक्षम इन-फ्लाइट सेवा, सुलभ प्रवासी प्रक्रिया आणि डिजिटल सुविधांचाही विस्तार करण्यात आला आहे. त्यामुळे प्रवाशांचा वेळ वाचण्यासह प्रवासाचा अनुभव अधिक सुलभ होणार आहे.
१२ प्रादेशिक मार्गांवर सुविधा उपलब्ध
फ्लाय ९१चे व्यवस्थापकीय संचालक मनोज चाको यांनी सांगितले की, प्रादेशिक विमान प्रवास अधिक किफायतशीर आणि प्रवासी-केंद्रित करण्याच्या उद्देशाने ‘स्मार्टबॅग’ सेवा सुरू करण्यात आली आहे. प्रारंभी ही सुविधा कंपनीच्या १२ प्रादेशिक विमान मार्गांवर उपलब्ध करून देण्यात आली असून, भविष्यात तिचा विस्तार करण्यात येणार आहे.
प्रादेशिक विमान वाहतूक क्षेत्रात प्रथमच सुरू करण्यात आलेल्या या उपक्रमामुळे अतिरिक्त सामानासह प्रवास करणाऱ्या हजारो प्रवाशांना मोठा दिलासा मिळणार असल्याची अपेक्षा व्यक्त होत आहे.
