बोरी नदीपात्रात बुडून ४० वर्षीय वाहनचालकाचा मृत्यू
पारोळा : तालुक्यातील भिलाली येथील बोरी नदीपात्रात पोहण्यासाठी गेलेल्या पारोळा शहरातील ४० वर्षीय इसमाचा पाण्यात बुडून मृत्यू झाला. सुनील अशोक चौधरी (वय ४०, रा. न्हावी गल्ली, पारोळा) असे मृताचे नाव आहे. दोन दिवसांच्या शोधानंतर शनिवारी सकाळी बोरी नदीवरील बंधाऱ्याजवळ त्यांचा मृतदेह पाण्यात तरंगताना आढळून आला.
सुनील चौधरी हे वाहन चालवून कुटुंबाचा उदरनिर्वाह करीत होते. गुरुवारी त्यांना भिलाली येथे लोखंडी दरवाजा पोहोचविण्याची ट्रिप मिळाली होती. त्यानुसार ते नितीन पाटील यांच्यासोबत वाहनाने भिलाली येथे गेले होते.
पोहण्यासाठी नदीपात्रात उतरले
काम आटोपल्यानंतर सुनील चौधरी व नितीन पाटील हे दोघेही जवळच असलेल्या बोरी नदीपात्रात पोहण्यासाठी उतरले. यावेळी नदीपात्रातील पाण्याच्या प्रवाहात सुनील चौधरी वाहून गेले. त्यांचा शोध घेण्यासाठी दोन दिवस प्रयत्न सुरू होते.
बंधाऱ्याजवळ मृतदेह आढळला
शनिवारी सकाळी बोरी नदीवरील बंधाऱ्याजवळ सुनील चौधरी यांचा मृतदेह पाण्यात तरंगताना आढळून आला. या घटनेमुळे पारोळा शहरातील न्हावी गल्ली परिसरात हळहळ व्यक्त होत आहे.
